Saltar al contenido

Publicador de contenidos

Volver a la página índice
Atrás

PORTOS DE GALICIA INICIARÁ O PRÓXIMO ANO A DRAGAXE DO PORTO DE CELEIRO E A REDACCIÓN DO PROXECTO PARA AMPLIAR O ESPIGÓN DO PEIRAO COMERCIAL

A presidenta de Portos de Galicia inaugurou as XXIV Xornadas técnicas de difusión do sector pesqueiro

  • O ente público investirá máis dun millón de euros na dragaxe e comezará tamén a redacción do proxecto para construír un pantalán de embarcacións menores
  • Estas actuacións súmanse ás habituais de conservación e mantemento que o organismo autonómico realiza nos peiraos da súa competencia
  • Susana Lenguas enxalza as XXIV Xornadas de difusión do sector pesqueiro por contribuír ao crecemento e á xeración de emprego e riqueza na Mariña lucense 

Viveiro (Lugo), 29 de novembro de 2019.- A presidenta de Portos de Galicia, Susana Lenguas, salientou hoxe como fundamental a mellora e modernización das infraestruturas portuarias para que a pesca galega siga sendo un sector estratéxico e cun valor xerado moi superior á media española. Con este obxectivo, explicou durante a inauguración das XXIV Xornadas técnicas de difusión do sector pesqueiro, o ente dependente da Consellería do Mar iniciará o próximo ano importantes actuacións en Viveiro como a dragaxe do porto de Celeiro e a redacción dos proxectos para a construción do pantalán de embarcacións menores e a ampliación do espigón do peirao comercial.

Segundo explicou a presidenta do ente público, a dragaxe do porto de Celeiro vén a dar resposta a unha demanda do sector e permitirá mellorar a operatividade no peirao e a capacidade de manobra das embarcacións. A actuación contará cun investimento de máis dun millón de euros, cantidade que se suma aos arredor de catro millóns de euros que o Executivo galego leva investidos nos últimos dez anos no concello de Viveiro para facilitar as actividades pesqueiras e portuarias.

De feito, Susana Lenguas destacou a importancia do porto de Celeiro como o terceiro de Galicia en actividade pesqueira froito da descarga anual de arredor de 14.000 toneladas de produtos do mar e unha facturación próxima aos 50 millóns de euros. “Por iso, é ineludible que facilitemos o labor diario nos nosos portos a todos aqueles que por un ou outro motivo dedican a súa vida ao mar”, subliñou a presidenta do ente público.

A esas importantes actuacións que está previsto que comecen o próximo ano, engadiu a representante do organismo dependente da Consellería do Mar, súmanse os habituais traballos de conservación e mantemento dos peiraos co obxectivo de que as infraestruturas portuarias permitan o crecemento e a mellora económica das vilas galegas. 

Neste sentido, a presidenta de Portos de Galicia mostrouse partidaria de traballar da man do sector para dar resposta ás necesidades que xurdan e asegurou estar convencida de que o mar ten futuro. Por iso, agradeceu a celebración destas xornadas e o labor dos seus organizadores, a confraría de pescadores de Celeiro, a Organización de Produtores Pesqueiros local (OPP-77) e o Grupo Puerto de Celeiro. “Van xa 24 edicións que contribuíron a converter Celeiro en capital da pesca e porto de atraque e partida de coñecemento, ideas e experiencias e motor de riqueza e emprego na Mariña lucense, polo que agardo que cumpra moitas edicións máis”, concluíu Susana Lenguas.

Relatorio sobre o proxecto Primare
Ademais da presidenta de Portos de Galicia, na xornada de hoxe deste encontro participa a directora xeral de Pesca, Acuicultura e Innovación Tecnolóxica da Consellería do Mar, Mercedes Rodríguez, que impartirá pola tarde o relatorio O proxecto Primare como plataforma dixital tecnolóxica nas lonxas galegas. A aposta de Galicia por unha xestión racional e sustentable dos recursos. Na súa intervención a representante do Executivo galego destacará a importancia de garantir a trazabilidade dos produtos do mar, de velar pola súa calidade e de promocionar o seu consumo co obxectivo de que acaden mellores prezos no mercado e que os profesionais do mar obteñan mellores rendas.